ДУШАНБЕ, 30.03.2020 /АМИТ «Ховар»/. Шаби гузашта дар километри 45-уми роҳи мошингарди  «Душанбе-Хуҷанд» сангрезӣ ба амал омад ва бар асари он касе осеб надид. Дар ин бора АМИТ «Ховар» бо истинод ба Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон хабар медиҳад.

Ба иттилои манбаъ, сангрезӣ ва канда шудани як санги азим аз кӯҳ муддате роҳи «Душанбе-Хуҷанд»-ро баст ва баъдан ҳаракати нақлиёт дар ин роҳ дубора ба роҳ монда шуд.

«Санги калон ба кабинаи мошини боркаш бархӯрд ва хушбахтона, ронанда осеб надид. Дар фурсати хеле кӯтоҳ масъулини филиали ширкати  «Innovative Road Solutions» роҳро аз сангу рег тоза карда, мошинҳо дубора ба ҳаракат даромаданд. Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон огоҳ мекунад, ки хавфи омадани селу тарма ва сангрезӣ дар роҳҳои кӯҳии мамлакат ҳамоно боқӣ мондааст»,- омадааст дар иттилоияи манбаъ.

Гуфта мешавад, ки бар асари боронҳои шадид дар минтақаҳои кӯҳии Тоҷикистон хатари омадани сел, резиши сангу рег ва лағзиши тарма боқӣ мондааст. Ҳаракат дар роҳҳои мошингарди  «Душанбе – Хуҷанд», «Душанбе — Сангвор», «Душанбе — Лахш», «Душанбе -Ванҷ» ва «Хоруғ — Ишкошим» дар чунин рӯзҳо хавфи бештар дорад.

Кумитаи ҳолатҳои фавқулода ва мудофиаи гражданӣ аз аҳолии мамлакат хоҳиш мекунад ҳангоми сафар тариқи роҳҳои кӯҳӣ эҳтиёткор бошанд, қоидаҳои ҳаракатро риоя кунанд ва суръати ҳаракат дар роҳро баланд накунанд.

-Ҳоло дар роҳҳо хавфи селу сангрезӣ ва лағзиши тарма бартараф нашудааст, — ҳушдор додааст Кумита.

АКС: «Innovative Road Solutions»